कति चोटि

कति चोटि हार्नु पर्छ, सदाको लागि हार्न?

कति चोटि छोड्नु पर्छ, सधैँभरिलाई छोड्न?

कति चोटि भन्नुपर्छ, आजदेखि चुरोट खान्न?

कति चोटि हेर्नु पर्छ, उसको प्रोफाइल?

कति चोटि भन्नुपर्छ, 'गुड-बाई'?

कति चोटि मन टुट्नु पर्छ?

कति चोटि मर्नु पर्छ, सदाको लागि मर्न?

एकदिन

 एकदिन तिम्रो मन कसो नपग्लिएला र

भन्दै बित्छ दिन

दिन असङ्ख्य सम्झनाको बाढीमा पौडिँदै गर्दा

एक दिन कसो किनारा नभेटिएला र भन्दै बित्छ

सिँढीबाटै गुल्टिएर झर्दा

एक दिन कसो भेटिँदैन र सफलता भन्दै बित्छ दिन

कोलाजहरूबाट निसासिँदै गर्दा एक दिन

कसो शान्ति नपाइएला र भन्दै बित्दछ दिन

सबैबाट एक्लिँदै गइरहँदा

एक दिन कसो म पनि नफर्कूँला भन्दै बित्दछ दिन

दिनहरू बिहान सबेरैदेखि अशान्ति मच्चाउँछन् र मेरो जिन्दगीमा उत्पात गर्छन्

एक दिन म तिमीलाई भेट्न जान्छु

हातमा गुलाफको फूल बोकेर

आँखामा सपना बोकेर

र मनमा असीम माया सम्हालेर

​मनदेखि भागेर कहाँ जान सकिन्छ

 ​मनदेखि भागेर कहाँ जान सकिन्छ

देश छोडेर कहाँ जान सकिन्छ

तिमीबाट छुट्टिएर कहाँ जान सकिन्छ —मैले खोजेँ।

​घामबाट छुटिएर किरण कहाँ जान्छ

जुनदेखि चुँहिएर शीतल कहाँ झर्छ

फूलबाट चुडिएर सुगन्ध कहाँ मिसिन्छ

हावालाई छोडेर सास कहाँ बहन्छ।

​यी कलमबाट निस्किएर त मसी अक्षर बन्दछ

​सम्हाल्न नसकेर त पोखिन्छ तिम्रो सम्झना,

आँखाको डिलबाट,

मनको भित्ताबाट—त्यही तिम्रो सम्झना सकिएर कहाँ जान्छ।।